"ఖుర్ఆన్" ప్రకారం బహుభార్యత్వం తప్పనిసరా?

నేడు ముస్లిం సమాజం పట్ల అనేక అపోహలు వ్యాపించి ఉన్నాయి. వాటిలో బహుభార్యత్వం ఒకటి.ముస్లింలు ఎన్ని వివాహాలనైనా చేసుకోవచ్చని అనేకులు భావిస్తుంటారు. కానీ అది సత్యదూరం. కేవలం కొన్ని ప్రత్యేక సందర్భాలలో, అనేక నిబంధనలతో మాత్రమే అందుకు అనుమతి లభిస్తుంది. నాటి అరబ్ సమాజంలో ఇస్లాం వ్యాప్తి చెందక ముందు స్త్రీకి భద్రత ఉండేది కాదు. పురుషుడు చాలా పెళ్లిళ్లు చేసుకునేవాడు. వ్యభిచారం సర్వసాధారణమై ఉండేది నాటి అరబ్ తెగల మధ్య చిన్న,చిన్న విషయాలకే భీకరయుద్దాలు జరిగేవి. అనేకమంది ప్రాణాలు కోల్పోయేవారు. వారి భార్యలు వితంతువులుగా, వారి సంతానం అనాధలుగా మారి సమాజం అస్తవ్యస్తంగా ఉండేది. ఈ దశలోనే ప్రవక్త ముహమ్మద్(స) వారు అనేక సంస్కరణలు తీసుకువచ్చారు. ఇస్లాంను వ్యాప్తి చేశారు.స్త్రీలను కొనడం,అమ్మడం, బలవంతంగా ఎత్తుకెళ్లడం, వ్యభిచరించడం మహా పాపమని ప్రవక్త బోధించారు.
          
          నాటి కాలంలో జరిగిన ఊహద్ యుద్ధం వల్ల అనేక విషమ పరిస్థితులు ఏర్పడ్డాయి. పురుషులు ఎక్కువ సంఖ్యలో చనిపోవడం వల్ల స్త్రీ, పురుష జనాభా నిష్పత్తిలో తీవ్ర వ్యత్యాసం ఏర్పడింది. అనాధాలైన పిల్లలు కనిపించేవారు. ఈ పరిస్థితుల్ని అధిగమించి సంక్షోభాన్ని నివారించేందుకు, అనాదలకు న్యాయం చేయలేమని భయం కలిగితే బహుభార్యత్వమ్ పాటించవచ్చునని ఇస్లాం అనుమతించిందే తప్ప తప్పనిసరి చేయలేదు.                         ఆకాలంలో అపరిమితంగా వున్న వివాహాల సంఖ్యను నాలుగుకు కుదించింది. పురుషుడు శారీరకంగా, ఆర్ధికంగా సమాన స్థాయి న్యాయాన్ని పాటించాలని అలా పాటించటం కష్టం కనుక ఏకపత్నీవ్రతమే శ్రేయస్కరమైనదని ఇస్లాం బోధించింది. ఇస్లాం కనుక బహుభార్యాత్వాన్ని నిషేధించి ఉంటే నాటి సమాజంలో స్త్రీలు,పిల్లలు అభాగ్యులుగా మిగిలిపోయేవారు. లైగీకనేరాలు, వ్యభిచారం ప్రబలి సమాజం నైతికంగా పతనమయ్యేది.

         ఇటువంటి ప్రత్యేక సందర్భాలను విస్మరించి కొందరు పురుషాహంకారులు చేసే తప్పులకు ముస్లిం సమాజాన్ని నిందించడం సరికాదు. నిజానికి ఏమతం బహుభార్యత్వాన్ని నిషేధించలేదని గ్రహించాలి. హిందువులు ఆరాధించే పురాణ పురుషులు, బైబిల్ లో అనేకమంది దైవప్రవక్తలు సైతం బహుభార్యత్వం పాటించినట్లు స్పష్టమవుతుంది.

         ఆధునికులమని చెప్పుకునే వారు నేటికీ వితంతు వివాహాలకు దూరంగా ఉంటారు. వీధి వంచితులైన వితంతువుల పట్ల సరైన ఆదరణ ఉండదు. కానీ 1400 సంవత్సరాల క్రితమే ప్రవక్త ముహమ్మద్(స) వితంతు వివాహం చేసుకుని ఆదర్శంగా నిలిచారు. పైగా వితంతు వివాహం పుణ్యప్రదమైనదని బోధించారు. ఈ కారణం వల్లనే ముస్లిం సమాజంలో వితంతు స్త్రీల వివాహం సులభమయింది. ఇటువంటి మానవీయ విలువలను పాటించే ముస్లిం సమాజంపై కమ్ముకున్న అపార్ధాలను తొలగించవలసిన బాధ్యత ముస్లిం మేధావులపై ఉంది.