Posted by Sakshyam Magazine on Monday, December 17, 2018
ఆసక్తికరమైన విషయం ఏమిటంటే ప్రవక్త ముహమ్మద్ (స) రాకడను గూర్చి బైబిల్లో ఒక్క కోణంలో కాదు, అనేక లేఖనాల ద్వారా వివిధ కోణాల్లో నిరూపించబడుతూనే ఉండటం! వాటిలో ఒకటి- ప్రవక్త ముహమ్మద్ (స) వారు “పదివేల మంది” పరిశుద్ధ శిష్యగణంతో వస్తారని ముందుగానే బైబిల్ లేఖనాలు ఎంతో స్పష్టంగా ప్రకటిస్తున్నాయన్నది. ఈ విషయాన్ని ఈ క్రింది లేఖనంలో గమనించగలరు.
ఆయన పారాను కొండ నుండి ప్రకాశించెను; “పదివేల మంది” పరిశుద్ధ సహచరులతో ఆయన వచ్చెను. – ద్వితీ 33:2
'HE SHINED FROM MOUNT PARAN, and HE CAME WITH TEN THOUSANDS OF SAINTS: FROM HIS RIGHT HAND WENT A FIERY LAW FOR THEM' -Deuteronomy 33:2
పై లేఖనంలో “పదివేల మంది” పరిశుద్ధ సహచరులతో ఆయన వచ్చెను (HE CAME WITH TEN THOUSANDS OF SAINTS)” అన్న వాక్యభాగం తెలుగు బైబిల్లో అయితే “వేవేల పరిశుద్ధ సమూహముల నుండి ఆయన వచ్చెను” అంటూ ఏ మాత్రం పొంతన లేని అనువాదం చెయ్యటం జరిగింది.
“పదివేల మంది” పరిశుద్ధ సహచరులతో రావలసి ఉన్న ఆ ప్రవక్త ఏ ప్రాంతానికి చెందిన వాడై ఉంటాడు?
“ఆయన పారాను కొండ నుండి ప్రకాశించెను” – ద్వితీ 33:2
పారాను మరియు సీనాయి కొండలు ప్రక్కప్రక్కన అరేబియా భూభాగంలోనే ఉన్నాయి.
“అరేబియా దేశములో ఉన్న సీనాయి కొండయే” – గలతీ 4:25
అన్న వాక్య భాగం ప్రకారం అరేబియాలో సీనాయి కొండకు ఆనుకుని ఉన్న పారాను నుండి ఆయన రానై యున్నాడు. అంటే “పదివేల మంది” పరిశుద్ధ సహచరులతో రావలసి ఉన్న ఆ ప్రవక్త అరేబియా ప్రాంతానికి చెందిన వాడై ఉంటాడని తేలిపోయింది.
“పదివేల మంది” పరిశుద్ధ సహచరులతో రావలసి ఉన్న ఆ ప్రవక్త ఏ పేరు కలిగిన వాడై ఉంటాడు?
“పదివేల మంది” పరిశుద్ధ సహచరులతో రావలసి ఉన్న ఆ ప్రవక్త ఎవరో ఆయన ఏ పేరు కలిగిన వాడై ఉంటాడో సోలోమోను ప్రవక్త ముందుగానే చెబుతున్న ఈ క్రింది జోస్యాన్ని బట్టి తెలుసుకోగలరు.
“నా ప్రియుడు ధవళ వర్ణుడు రత్న వర్ణుడు “పదివేల మంది” పురుషులలో అతని గుర్తించవచ్చు” – పరమగీతము 5:10
My beloved is white and ruddy, the chiefest among TEN THOUSAND - Songs of Solomon 5:10
“పదివేల మంది” పరిశుద్ధ సహచరులతో ఆయన వచ్చెను (ద్వితీ 33:2) అని మోషే చెప్పిన జోస్యాన్నే సోలోమోను సైతం “పదివేల మంది” పురుషులలో అతని గుర్తించవచ్చు” అంటూ వివరిస్తున్నాడు. ఆయన ఏ పేరు కలిగి ఉంటాడంటే...
“అతని నోరు అతి మధురం, అతడు అతి కాంక్షనీయుడు యేరూషలేము కుమార్తెలారా, ఇతడే నా ప్రియుడు ఇతడే నా స్నేహితుడు” – పరమ 5:16
పై లేఖన భాగాన్ని ప్రాచీన హెబ్రూ లో గమనిస్తే...
“హిక్కో ముమిత్తకిమ్ వి కుల్లు “ముహమ్మదిమ్” జహ్ దూద వ జహ్రీ బాయ్ నా జరూసలేం”
అని చదవగలం. “ముహమ్మద్” అనే పదానికి “అతి కాంక్షనీయుడు” అని అర్థం. ఈ విధంగా “పదివేల మంది” పరిశుద్ధ సహచరులతో రావలసి ఉన్న ఆ ప్రవక్త “ముహమ్మద్” అనే పేరు కలిగి ఉంటాడని కూడా తేటతెల్లమైంది. ఇక ప్రవక్త ముహమ్మద్ (స) వారి పేరు అదే బైబిల్లో ఈ నాటికీ “అహ్మద్” అని సైతం వ్రాయబడి ఉన్నట్లు గమనించగలం. ఈ విషయాన్ని క్రింది హగ్గయి 2:7 లేఖనాన్ని హెబ్రూలో చదవటం ద్వారా తెలుసుకోగలరు.
“యూ, ఎరోషిత్, అత్ కి ఈగూయిమ్ యుబావు “అహమద్” కి ఈగూయిమ్”
పై హెబ్రూ లేఖనం యొక్క సరైన అనువాదం చదవండి.
“I will shake all the nations, and HAMADA [AHMAD] shall come for all the nations” – Haggai 2:7
పై లేఖనాన్ని ఏ మాత్రం పొంతన లేకుండా తెలుగులో అనువాదం చెయ్యటం జరిగింది. వాస్తవానికి "HAMADA [AHMAD] shall come for all the nations” అన్న వాక్య భాగపు అర్థం - "ప్రపంచదేశాలన్నిటి కొరకు అహ్మద్ రాబోతున్నాడు" అన్నది.
ఈ విధంగా “పదివేల మంది” పరిశుద్ధ సహచరులతో రావలసి ఉన్న “ఆ ప్రవక్త” “ముహమ్మద్” “అహ్మద్” అనే పేర్లతో పరిచయం కాబడతారని ఇప్పటి వరకు గమనించిన బైబిల్ వాక్యాల వెలుగులో తెలుసుకున్నాం. “పదివేల మంది” పరిశుద్ధ సహచరులతో రావలసి ఉన్న “ఆ ప్రవక్త” ను గూర్చి మోషే, సోలోమోను ప్రవక్తలు మాత్రమే కాదు హానోక్ ప్రవక్త చెప్పిన జోస్యాన్ని ఈ క్రింది గమనించగలరు.
“ఆదాము మొదలుకొని యేడవవాడైన హానోకు కూడా వీరిని గురించి ప్రవచించెను- ఇదిగో అందరికిని తీర్పు తీర్చుటకును, వారిలో భక్తిహీనులందరును భక్తిహీనముగా చేసిన వారి భక్తిహీన క్రియలన్నిటి గూర్చియు, భక్తిహీనులైన పాపులు తనకు విరోధముగా చెప్పిన కఠినమైన మాటలన్నిటిని గూర్చియు వారిని ఒప్పించుటకును, ప్రభువు తన “పదివేల మంది” పరిశుద్ధుల పరివారముతో వచ్చెను” – యూదా 1:14-15
“ప్రభువు తన “పదివేల మంది” పరిశుద్ధుల పరివారము (TEN THOUSAND OF HIS SAINTS) తో వచ్చెను” హానోక్ ప్రవక్త చెప్పిన జోస్యాన్ని బట్టి కూడా పారాను ప్రాంతం నుండి ఆ ప్రవక్త పదివేల మంది శిష్యులతో రానైయున్నారని తేటతెల్లమైంది.
గమనిక: పై వాక్యంలో సైతం “పదివేల మంది” పరిశుద్ధ పరిశుద్ధుల పరివారము (TEN THOUSANDS OF SAINTS) తో ఆయన వచ్చెను ” అన్న వాక్యభాగం సైతం తెలుగు బైబిల్లో “వేవేల పరిశుద్ధుల పరివారముతో వచ్చెను” అంటూ ఏ మాత్రం పొంతన లేని అనువాదం చెయ్యటం జరిగింది అన్నది గమనించాలి. "పదివేల మంది పరిశుద్ధుల పరివారము" అన్న పదాన్ని "వేవేల పరిశుద్ధుల పరివారము" అని మార్చి అనువాదం చెయ్యటం కేవలం ప్రవక్త ముహమ్మద్ (స) వారి ప్రస్తావనను కప్పిపుచ్చటంలో భాగంగా జరిగిన కుట్ర అని తెలియటం లేదూ?
క్రైస్తవ చరిత్రకారుల ప్రకారం సైతం “పదివేలమంది” పరిశుద్ధ శిష్యగణంతో వచ్చిన ప్రవక్త- ముహమ్మద్ (స)!
ప్రవక్త ముహమ్మద్ (స) వారి గురించి అధ్యయనం చేసిన ప్రముఖ చరిత్రకారులు సైతం తాము రచించిన గ్రంధాలలో ప్రవక్త ముహమ్మద్ (స) మక్కా నుండి మదీనాకు తన “పదివేలమంది శిష్య గణం”తో ప్రవేశించారని సాక్ష్యం ఇవ్వటం అత్యంత గమనార్హం. ప్రపంచ ప్రఖ్యాతి గాంచిన “ద హిస్టరీ ఆఫ్ గాడ్” పుస్తక రచయత్రి మరియు రోమన్ క్యాథలిక్ నన్ అయిన “కరేన్ ఆర్మ్ స్ట్రాంగ్” తన ప్రముఖ పుస్తకమైన “ముహమ్మద్’ ఎ బయోగఫీ ఆఫ్ ద ప్రోఫెట్” అన్న పుస్తకంలో వ్రాసిన ఈ క్రింది గమనార్హమైన సమాచారాన్ని చదువగలరు.
“రామజాన్ మాసం 20 వ తారీఖున (గురువారం, హిజ్రీ శకం 8, (11 జనవరి 630) ముహమ్మద్ తన సైన్యంతో మక్కాలో ప్రవేశించారు. కానీ ముహమ్మద్ మక్కాలో తన శత్రువులందరినీ క్షమాపణ అనుగ్రహించి, వారు ధర్మం పట్ల కలిగి ఉన్న అపార్థాలన్నిటినీ తుడిచిపెట్టేశారు. అనంతరం కాబా గృహం చుట్టూ 7 సార్లు ప్రదీక్షణ చేసి తన వెంట వచ్చిన “పదివేల మంది శిష్య గణం” తో పాటు “దేవుడే గొప్పవాడు అన్న నినాదం చేశారు” – Ref: “కరేన్ ఆర్మ్ స్ట్రాంగ్” - “ముహమ్మద్’ ఎ బయోగఫీ ఆఫ్ ద ప్రోఫెట్”
ఈ విధంగా ప్రవక్త ముహమ్మద్ (స) పారాను ప్రాంతం నుండి తన “పదివేల మంది” పరిశుద్ధ శిష్య గణం తో రానైయున్నారని, ఆయన “ముహమ్మద్” అన్న పేరు కలిగి ఉంటారని ప్రత్యక్షంగా పరిశుద్ధ బైబిల్లో అనేక మంది ప్రవక్తల సాక్ష్యాన్ని చదివిన తరువాత కూడా నేటి క్రైస్తవ సోదరులు ముహమ్మద్ (స) ను ప్రవక్తగా అంగీకరించక తిరస్కరించటం ప్రత్యక్షంగా బైబిల్ లేఖనాలను త్రోసిపుచ్చటమే అవుతుంది.
Md Nooruddin